ក្រុមហ៊ុនហ៊ុនរបស់ថៃ Rojana Industrial Park Plc (ROJANA) នឹងសាងសង់សួនឧស្សាហកម្មមួយកន្លែងនៅក្នុងប្រទេសកម្ពុជា ដែលបច្ចុប្បន្ន ក្រុមហ៊ុនកំពុងសិក្សាពីលទ្ធភាពមួយក្នុងគម្រោងសួនឧស្សាហកម្ម ហើយនឹងជ្រើសរើសទីតាំងមួយរវាងភូមិស្ទឹងបត់ នៅខេត្តបន្ទាយមានជ័យ ឬតំបន់សេដ្ឋកិច្ចពិសេសអូរនាង នៅក្រុងប៉ោយប៉ែត សម្រាប់ធ្វើជាទីតាំងសួនឧស្សាហកម្មមួយនេះ នេះបើតាមប្រសាសន៍របស់លោក Khajonsak Mahakunnawan ទីប្រឹក្សាក្រុមហ៊ុន Rojana។
ការសិក្សាពីសំណើនៃលទ្ធភាពក្នុងតំបន់ទាំងពីរ ដែលនៅជាប់នឹងព្រំដែនប្រទេសថៃនេះ អាចនឹងត្រូវបញ្ចប់នៅចុងឆ្នាំ ២០១៥នេះ ស្របពេលជាមួយការមកដល់នៃ សហគមន៍សេដ្ឋកិច្ចអាស៊ាន ដែលអាចពង្រីកកំណើនវិនិយោគនៅកម្ពុជា។
ការអភិវឌ្ឍន៍តំបន់ឧស្សាហកម្មនេះ គេបានរំពឹងថា នឹងទាក់ទាញវិនិយោគទាំងនៅក្នុងតំបន់សេដ្ឋកិច្ចពិសេស ដែលក្រុមហ៊ុននេះគ្រោងសាងសង់ឡើងនៅ ខេត្តស្រះកែវ ប្រទេសថៃ និងក្នុងតំបន់សេដ្ឋកិច្ចពិសេសអូរនាង នៅក្រុងប៉ោយប៉ែត។
លោក Khajonsak បានឲ្យដឹងដែរថា ក្រុមហ៊ុន Rojana នឹងបង្កើតតំបន់ឧស្សាហកម្មបន្ថែមទៀត នៅតាមបណ្តាប្រទេសជិតខាងរបស់ថៃ ដើម្បីទាញយកផលប្រយោជន៍ពីកំណើនសេដ្ឋកិច្ច ដោយសារវត្តមានសហគមន៍សេដ្ឋកិច្ចអាស៊ាន (AEC) ដែលនឹងចាប់ផ្តើមនៅចុងខែ ធ្នូ ឆ្នាំ ២០១៥ខាងមុខនេះ។ ក្រុមហ៊ុននេះ ក៏បានចាប់ដៃគូរួចទៅហើយដែរ ជាមួយក្រុមហ៊ុន អភិវឌ្ឍន៍ ថៃ-អ៊ីតាលី ភីអិលស៊ី ក្នុងការបង្កើតតំបន់ឧស្សាហកម្ម នៅឯតំបន់សេដ្ឋកិច្ចពិសេស Dawei ប្រទេសមីយ៉ាន់មា។
គួរជម្រាបជូនថា សួនឧស្សាហកម្មដែលគ្រោងនឹងសាងសង់ឡើងនេះ នឹងត្រូវសាងសង់លើទំហំផ្ទៃដី ជាង ១ពាន់រ៉ៃ (១៦០ហិចតា) ដែលសួនឧស្សាហកម្មមួយនេះ នឹងបម្រើឲ្យវិស័យមួយ ចំនួនដូចជា វិស័យកាត់ដេរ វាយនភ័ណ្ឌ ការកែច្នៃកសិកម្ម និងគ្រឿងអេឡិចត្រូនិក៕ ឯកសារៈ ពាណិជ្ជកម្មកម្ពុជា
No comments:
Post a Comment